-احكيلنا كده على أهم المواقف حصلت وانتو بتعملوا "العيال كبرت" يا مدام نادية
=فيه موقف لطيف اوي ، انا كنت وقتها متخاصمة مع بابا الله يرحمه ومقاطعني ومش بيكلمني وبعدين داخلة على المسرح فكان أيامها فيه كراسي إكس كده في أول صف في الصالة بتبقى قدامنا علطول فدخلت بمثل وعايشة حياتي عادي وبعدين فجاة عيني راحت على الجمهور لقيت بابا قاعد تحت في أول صف طبعا مش هقولك اللي جرالي اتخضيت ومبقيتش عارفة اعمل حاجة واتلبخت اوي فسعيد صالح كان عمال يبصلي من برا مش فاهم ايه اللي حصلي وانا خارجة في الكالوس قلتله "بابا تحت" ، قالي "وايه يعني هو
هيدبـ. ـحك ؟!" .. قلتله "معرفش بقى بس انا مش قادرة اخرج وهو موجود ومخاصمني" ، قالي "طب اسكتي" ، وكان بيلبس الجلابية بتاعته ودخل ع المسرح وبابا في أول صف وقريب منه اوي يعني ممكن سعيد يمد ايده يجيبه وفجأة سعيد ساب المسرحية وقال لبابا "يا عم شكري فيه ايه ؟! دي بنتك بلاش تعاملها كده !" ، طبعا الجمهور ضحك وبابا اتبسط اوي لانه كان بيحب سعيد اوي .. بعد ما خلص العرض وانا بلبس عشان اروح لقيت باب الأوضة عندي بيخبط جامد اوي ولقيت صوت سعيد بيقولي "اطلعي بقى !" ، فتحت الباب لقيته بيشدني من ايدي وبيجري بيا في الشارع في وسط الجمهور اللي خارج من المسرحية والناس بتجري ورانا مش فاهمين فيه ايه واحنا مكملين جري لحد ما وصلنا لعربية بابا قام سعيد مسكه قبل ما يركب العربية وقاله "خد بنتك في حضنك يا عم شكري وبلاش الحركات دي عيب عليكم" ، بس وصالحنا على بعض .. هو ده كان سعيد الله يرحمه مفيش أجدع ولا أجمل منه ❤️